Skíðaði aðeins í Oddskarði í fyrradag. Frábærar brekkur þó færið væri ansi erfitt.

Sést þarna yfir Eskifjörð og inn Reyðarfjörð og í fallegt álverið...

Skelltum okkur norður aftur og nýbúin. Ætlunin var að fara á skíði. Það náðist í tvo tíma á föstudag en ekki söguna meir. Spáin er búin að vera fín en raunin önnur. Nú vitum afhverju menn halda að það sé alltaf gott veður á Akureyri...! :)

Í staðinn er bara legið og slakað á, teknir göngutúrar og allt það maður gerir ef maður ekki á skíðum.

En vonandi er batnandi tíð með snjó og stillu framundan.

Skelltum okkur norður til Akureyris með mann og mús og tvær stúlkur. Hér er nú varla vetrartíð. Rétt nægur snjór í fjallinu til skíðaiðkunar. Við skiptumst á að skíða. Fyrst fór ég með Ágústu nokkrar ferðir í "töfrateppið". Hún er ennþá meira að hanga á pabba sínum en skíða með honum... Svo skellti Hólmfríður sér hring á gönguskíðunum meðan ég skemmti stúlkunum.

Einnig voru farnar nokkrar ferðir í brekkurnar þrátt fyrir langar biðraðir og nokkuð harðfenni! Fínt að komast í kyrrðina fyrir norðan og getað bloggað smá og sett inn eina mynd! :)

Það var nú ekki ætlunin að leggja niður langsokkinn. Hann hefur kannski sjálfur verið orðinn óþolinmóður yfir því að fá enga athygli og því farið í vikulanga fýlu. Harði diskurinn í vefþjóninum hrundi og allt með. Ég átti sem betur fer 4 daga gamalt afrit, en þurfti að setja upp öll forrit. Það gekk eitthvað óvanalega illa. Fékk hluti ekki til að tala saman. Kannski vegna þess að ég ætlaði að taka mér styttri leið en vanalega og nota forritapakka sem heitiir Easyphp, og kemur með Apache, php og mysql saman, en það var ekkert easy við hann! :)

Í sárabætur lofa ég upp í ermina á mér nokkrum myndum af litlu stúlkunni á næstu dögum! :) En uppeldið hefur tekið tíma undanfarið og ekki mikill tími, ef nokkur, til að sortera myndir og setja á netið...

Comment verða þó eitthvað skrýtin, en nothæf næstu daga.

Á fimmtudag fæddist okkur Hólmfríði lítil stúlka, þó frekar stór, 18 merkur rúmlega. Allir hressir og kátir nú þegar allt er að falla í fastar skorður, stúlkan að sofa vel, drekka vel og halda pabba sínum uppteknum með bleyjuskiptingum. Hólmfríður verður heima við í vetur en pabbinn þarf að vinna. Nokkrar myndir finnast með því að smella á þessa mynd:

Ágústa var lítið heima hjá sér um helgina og er enn að átta sig á þessu. Veit ekki alveg hvort hún á að vera abbó eða bara glöð að hafa litla systur til að leika við. Það er búið að ræða þetta svo mikið við hana að gleðin verður örugglega ofan á.

Ég lofa að bæta við fleiri myndum á næstunni! :)

Meðan beðið er eftir Járngerði er fínt að skoða myndir af ferðalögum sumarsins. Er ekki gott að eiga svona vini sem sjá um þetta fyrir mann...?

Ýmsar skemmtilegar myndir og sumar hrikalegar, aðrar af klikkuðum manni!

Á maður nokkuð að vera að skrifa hérna á sumrin? Nú er kominn vetur formlega (las það í blöðunum...) og því tími til að blása lífi í þetta.

Hólmfríður er sett 5. sept sem er á laugardaginn eftir 3 daga og hætt að vinna. Allavega hætt að mæta í vinnuna. Þannig að við bíðum bara spennt eftir litlu stúlkunni, codename: Járngerður.

Höfum líka verið á fullu að innstilla það í Ágústu að hún sé að verða stóra systir og þurfi að vera rosalega dugleg og fyrirmynd; fara ein að sofa, snemma að sofa, klæða sig sjálf, fara sjálf á koppinn osfrv. Það gengur ágætlega. Höfum líka sagt að hún verði að lána bangsana sína og kemur þá svarið; "Ég lána litla barninu, fyrst ég, svo litla barnið". Bara svo það sé á hreinu hver kemur fyrst.

Semsagt bara spenna í loftinu! :)